Тормышка аяк басасыз,
Пар килгәнсез икегез.
Сөешеп кенә яшәгез,
Тигез гомер итегез.
* * *
Түр башында урыныгыз,
Икегез дә сөйкемле,
Икегез дә пар килгәнсез
Куш каеннар шикелле.
* * *
Сөйгән ярлар булыгыз,
Тигез парлар булыгыз.
Үзегез күк матур булсын
Кызыгыз һәм улыгыз.
* * *
Тигез гомер итегез,
Шаярыгыз, көлегез.
Кирәк чакта бер-береңә
Юл да куя белегез
* * *
Бәхет белән шатлыклар
Сездән ерак йөрмәсен.
Кайгы-хәсрәт дигәннәре
Сезнең йортка кермәсен.
* * *
Көнче дигән кара мәче
Арагызга кермәсен.
Дусларыгыз чын дус булсын,
Көнче була күрмәсен. ;
* * * ;
Ай, икегез, икегез,
Икегез дә бертигез.
Пар күгәрченнәр шикелле
Тигез гомер итегез.
* * *
Кияү-кәләш идегез,
Ир дә хатын булдыгыз.
Инде хәзер шушы хәлдә
Йөзгә кадәр торыгыз.
Үзегез күп ул-кызларга
Ата-ана булыгыз.
***
Яшь кияүгә теләкләр
Сайлап меңнәр арасыннан
Таптың бүген парыңны.
Бу тормышның җилләреннән
Инде сакла ярыңны.
***
Яшь киленгә теләкләр
Каршыла эштән иреңне
һәрчак ачык йөз белән.
Аны көн дә аптыратма
Төрле көнче сүз белән.
Ашларың тәмле булсын дип
Теләмим тиккә генә:
Ашказаны аша үтә
Юл ирнең йөрәгенә.
Онытма йокларга яткач
Иреңне яратырга.
Ике елга бер булса да,
Баргалап кайт роддомга.